Qui Sommes-Nous - Filles de Saint Paul

NY FIAINAM-PANAHIN’IREO MASERA FILLES DE ST PAUL

Voafintin’i Mômpera Alberione toy izao ny fiainam-panahin’ny Filles de St Paul: Mivelona manontolo ny Evanjelin’i Jesoa Kristy Lalana sy Fahamarinana ary Fiainana, araka ny toe-tsain’i Md Paoly, eo ambany fiarovan’i Masina Maria Mpanjakavavin’ny Apôstôy”.

Ny Eokaristia, ny Tenin’Andriamanitra sy ny fibanjinana an’i Jesoa Mpampianatra no iveloman’ny fikambanana.

Ny Masera Filles de Saint Paul dia antsoin’Andriamanitra hanokana ny fiainany manontolo ho an’ny fitoriana ny Tenin’Andriamanitra.

Antitraterin’i Mômpera Alberone fa tena ilain’ny vatan’ny olombelona ny sakafo mba hahazoana antoka fa ho afaka hiaina amim-pahamendrehana izy. Tena zava-dehibe ary adidy napetraka hiantsorohanay, koa araka izany ny mizara ny Tenin’ny Fiainana, mofon’ny Evanjely, mba hamokisana ilay fanahin’olona noana ny Fahamarinana sy mangetaheta an’Andriamanitra.

Nanasa anay Filles de Saint Paul i Mômpera Alberione mba hametraka ny Tenin’Andriamanitra ho lohalaharana amin’ny iraka ankinina aminay. Fa hoy koa izy: “Tsy momba ny finoana ihany no ambarao fa ny zavatra rehetra no lazao amin’ny fomba Kristianina”. Ampitainy taminay koa fa tokony homen-danja ny fampiasana ny fitaovan-tserasera, ary mitady fomba vaovao hatrany hanapariahana ny Evanjely, amin’ny fiezahana hanatona ny olona: eny amin’ny sampanan-dalana rehetra eny, amin’ny toerana hihaonan’ny olona amin’izay dia hihamaro ireo hahalala an’i Jesoa sy handray Azy.

FIAINAM-PANAHIN'NY MASERA FILLES DE ST PAUL

Fanomezam-pahasoavana

Noho io fiantsoana izay fanomezana avy amin’ny Ray io dia manana andraikitra izahay hivelona lalina kokoa ny fahasoavana vokatry ny sakramentan’ny batemy sy ny fankaherezana ary hanao ny fiainanay ho famantarana ny Fanjakan’Andriamanitra.

Miaina eo anivon’ny ankohonan’ny mpirahavavy izahay, ary atokanay manontolo ho fanompoana ny Evanjely sy ny vahoakan’Andriamanitra ny fiainanay, ny herinay, ny ainay, ny fahaizanay.

Ny fiainam-panahy

Voafintin’ny mpanorina toy izao ny fiainam-panahinay: «Mivelona manontolo ny Evanjelin’i Jesoa Kristy Mpampianatra, Lalana sy Fahamarinana ary Fiainana tahaka ny niveloman’i Md Paoly Azy, eo ambany fiarovan’i Masina Maria Mpanjakavavin’ny Apôstôly”.

Ary ao amin’i Jesoa Eokaristia sy ao amin’ny Tenin’Andriamanitra ary eo anivon’ny ankohonam-piainana izahay no manovo ny hazavana sy ny hery rehetra entina miaina ny fiantsoana anay isan’andro.

I Jesoa Mpampianatra

Izy no manentana anay ka mahatonga ny asanay ho fanompoana sy mampanjary ny fiainanay manontolo ho fivavahana tsy tapaka.

I Md Paoly

Ny anarana entinay hoe Filles de Saint-Paul dia maneho miharihary ny fifandraisanay lalina amin’i Md Paoly.

Tsy hoe mpiaro anay fotsiny i Md Paoly fa tena ray, mpanolotsaina, môdely sy fakan-tahaka amin’ny fomba fanarahan-dia an’i Jesoa sy ny fitoriana an’i Jesoa Kristy Lalana sy Fahamarinana ary Fiainana, amin’ny alalan’ny fitaovam-pifandraisan’ ny mpiara-belona. Môdely ho anay izy amin’ny fiombonam-piainana amin’i Jesoa Kristy, ka nilazany mazava hoe: «Tsy izaho intsony no velona fa i Kristy no velona ato amiko” (Galata 2,20).

Izy ihany koa ilay Apôstôly tsy nahalala sisin-tany nitory an’i Kristy sy ny hafany hatraiza hatraiza. Ka hoy izy: «Raha mitory ny Vaovao Mahafaly aho dia tsy mba izany no voninahitro, fa adidy tsy maintsy efaiko izany, ka loza ho ahy raha tsy mitory ny Vaovao Mahafaly aho.» (1Kôrintianina 9,16)

I Masina Maria Mpanjakavavin’ny Apôstôly

Izy no mpanabe mitantana anay amin’ny fandraisana ny fampianaran’i Jesoa sy manofana anay amin’ny fiainan’ny apôstôly.